Udako oporraldia amaituta, bihar zabalduko dute Gaztelekua. Hala ere, datozen asteetan ez du ohiko egutegi eta ordutegia izango. Izan ere, ohiko martxari ekiteko, ate irekien saioa eta erabiltzaileen izen-ematea egin behar dituzte aurrez.
Datozen egunetan, bihartik ostegunera arte, ate irekien saioa egingo dute, DBH1eko eta DBH2ko gazteei zuzenduta, 17:00etatik 18:30era bitartean. Aldiz, 18:30etik 20:00etara edozein nerabek izango du Gaztelekura hurbiltzeko aukera. Irailaren 22an, DBH 3tik gorako gaztetxoen txanda izango da, eta 16:30etik 20:00etara izango dituzte zabalik Gaztelekuko ateak.
Izen-ematea
Irailaren 26an, 27an eta 28an Gaztelekua nerabeen erabilerarako itxita egongo da, egun horietan egin beharko baita izen-ematea. DBH 1 eta 2ko nerabeen gurasoek Gaztelekura bertaratu beharko dute beren seme-alaben izenak ematera. Egun horietan honako ordutegian lan egingo dute hezitzaileek: 11:00etatik 19:00etara. Gaztelekua irailaren 29an itzuliko da ohiko ordutegira.