Hilaren 29ra arte luzatu du Bakailao Txapelketan izena emateko epea Marea Arroxak. Norbanako bezala edota elkarte gisa eman daiteke izena 943-15 70 68 edo 688-89 37 32 telefono zenbakietara deituta. Izen-ematea doakoa da, baina parte hartzea mugatua izango da, eta 40 taldek hartuko dute parte gehienez. Festa herrikoien aldeko batzordeak azaldu duenez, "parte-hartzaileek azken egunetan egiten dute izen-ematea" eta horregatik erabaki dute uztailaren 29ra arte luzatzea.
Marea Arroxak adin guztietako herritarrei dei egin die plazara irtetera eta beren abileziak gainerako herritarrekin batera erakustera.
Bazkarirako sarrerak salgai
Bakailao txapelketaren osteko bazkarirako sarrerak ere salgai daude jada. Hala, honako taberna hauetan egongo dira sarrerak: Pastorkua, Jim Clark, Orkatz eta Sanagustin. Aurtengoan, berrikuntzekin dator Bakailao Txapelketa, izan ere, bazkalostean bertso saioa izango da trikitilariek girotuta. Jon Gurrutxaga azpeitiarra, Maialen Akizu, Aitor Salegi eta Maider arregi ariko dira kantuan.