Saninazioak 2017

Trikitia edo panderoa jotzen dakien edonor animatu du Marea Arroxak hilaren 30eko kalejirara

Uztarria.eus 2017ko uzt. 24a, 14:52
Marea Arroxako trikitilariak, iaz.

Aurten dantza eta triki doinuak izango dira protagonista txupinazoaren osteko kalejiran. Horregatik, Marea Arroxak dei egiten die trikia eta panderoa jotzen dakien herritar orori bertan parte har dezaten. Berrikuntza bezala, herriko hainbat txokotan dantza jakin batzuk egingo dituzte uztailaren 30eko kalejiran. Datozen egunetan emango du Marea Arroxak horien berri. 

Uztailaren 30ean, behin txupinazoa botata, urtero bezala Marea Arroxak hartuko ditu herriko kaleak. Aurten, trikiti eta pandero doinuz lagunduta egingo dute ibilbidea, eta horregatik Huajijijai batzordeak dei egin die herriko panderojole zein trikitilariei kalejiran parte har dezaten. Kalejiran joko dituzten kantuak honakoak dira: Beti eskamak kentzen, Bide alaigarri, Pupurria, Lesaka bidean, Egun da santimamiña.

Dantzarako parada

Marea Arroxak aurreratu duenez, berrikuntza bezala, dantza jakin batzuk dantzatzeko tutorialak argitaratuko ditu datozen egunetan, eta horiek egingo dituzte uztailaren 30ean herriko hainbat txokotan. Dantzaz lagunduko dituzten kantak Polka, Zazpi jauzi, Lantzeko ihauteriak eta Ai ixabel dira.