Bukatzear dago Sanjuandegi eta Etxebeltz-Izarra eremuko hirigintza proiektua

Uztarria.eus | Hirigintza | Artikulua
2017-07-14 13:32

Sanjuandegi eta Etxebeltz-Izarra eremua lotzen dituen zubia nahiz Urola ibaiaren uholde arriskuak saihesteko lanak amaitu dituzte dagoeneko, eta Loiolabideko aparkalekua egokitzeko lanak datozen asteetan amaitzea aurreikusten du Udalak. Hala, Sanjuandegin egindako lan horiekin guztiekin, Salbe ingurua "indartu" dutela esan du erakundeak. Gainera, ibaiari balioa eman eta inguru hori aisialdirako leku izateko ahalegina egin duela nabarmendu dute udal ordezkariek. Bestalde, inguru hori hobetzen jarraitzeko asmoa azaldu dute, eta aurreratu dute igerilekuaren eraikin zaharra eraberrituko dutela datozen hilabeteetan. 

Azken txanpan sartu da Sanjuandegiko eta Etxebeltz-Izarrako hirigintza proiektua. Izan ere, ibaiaren bi aldeak lotzen dituen zubia amaitu dute jada –aste honetan hasi dira autoak bertatik igarotzen–, baita Urola ibaiaren uholde arriskuak saihesteko lanak ere. Urbanizazio proiektua amaitzeko falta den eremu bakarra, Loiolabide ondoko aparkalekua, datozen asteetan amaitzea aurreikusten du Udalak. 

Eneko Etxeberria alkateak azaldu duenez, 2006. urtean erabaki zuen Udalak auzo berria, gaur egun Etxebeltz-Izarra dena, eraikitzea. Orduan, gaiak "polemika handia" eragin zuela azaldu du, besteak beste, krisi ekonomikoa tartean zelako. "Hala ere, Udalak etxe horiek eraikitzeko apustua egin zuen, eta 300.000 euro inguru jarri zituen. Baina egin behar ziren obrak atzeratzen joan ziren pixkanaka, arazo juridiko pila bat agertu zelako. Etxeak egitea ere zalantzan jarri zen", azaldu du alkateak. Hori dela eta, 2010ean erabaki zuten urbanizazio lanak berehala egin beharrean, fase ezberdinetan egitea. Gaur egun, auzo berriko etxe gehienak salduta daude, eta horrekin batera, bukatzear dute hirigintza proiektua. "Horrek esan nahi du, Loiolako bide zaharra oinezkoentzat egokitu dela, Loiolabide ondoko aparkalekuaren eremuko zuloen arazoa konpontzear dela eta bi auzoak –Sanjuandegi eta Etxebeltz-Izarra– lotzen dituen zubia eginda dagoela", azaldu du Etxeberriak. Era berean, nabarmendu du zubiaren diseinua ez dela orain egindakoa, "bere garaian diseinatutakoa" baizik. Salbe pareko obrek izan duten egituraren harira, azaldu du uholde arriskuak saihesteko egin dituztela era horretan, Uraren Euskal Agentziak exijituta. Orain, Urola ibaiaren eta Salbeko etxebizitzen artean dagoen oinezkoentzako bidea metro batzuk altuago dago, uholdeak saihestea xede.

Egindako lanei esker, auzoa "indartzen" ari dela uste du Etxeberriak, eta Udalak horretan jarraitzeko asmoa duela esan du. "Igerilekuaren eraikin zaharra berritzeko asmoa dugu, baita eraikina energia berriztagarriekin egokitzeko ere. Urbikolan enpresak egingo ditu lanak. Horren inguruko informazioa aurrerago emango dugu eta igerilekuko erabiltzaileei ere igorriko diegu informazioa", azaldu du Azpeitiko alkateak.  

Hirigintza lan guztiek hiru milioi euroko gastua izan dute, eta auzoari "kutsu berri bat" eman diotela esan du Etxeberriak. Izan ere, Udalak azaldu duenez, 40 urte dira azkenekoz Salbe inguruan hirigintza lanen bat egin zela.

Autobusen afera

Etxebeltz-Izarra eta Sanjuandegi lotzen dituen zubi berria dela eta, eztabaidagai izan dira inguru horretatik igarotzen diren autobusen ibilbideak eta horien geltokiak. Iritzi kontrajarriak agertu dituzte Sanjuandegiko bizilagunek eta Etxebeltz-Izarrakoek. Udalak, bere aldetik, alternatiba ezberdinak aztertu ditu, eta horien berri emateko eta herritarren iritziak jasotzeko bilkura zabala egin zuen ekainaren 7an

Eneko Etxeberria alkateak azaldu duenez, "autobus ugari" igarotzen da Sanjuandegitik, eta autobus horiek "nonbaitetik" igaro behar dutela esan du. Horren harira, azaldu du, bi aukera posible daudela: lehen bezala Sanjuandegitik igarotzea edo Loiolako hiribidetik igarotzea. Era berean, nabarmendu du, ibilbide bat ala bestea egiteko arazo teknikorik ez dagoela. "Uneotan Udalak hartu duen erabakia da lehengo geltokiei eustea eta aldaketarik ez egitea. Hala ere, Udala prest dago, herritarrek hala nahi balute, galdeketa prozesu bat martxan jartzeko", azaldu du Etxeberriak. Datozen egunetan hasiko dira autobusak zubi berritik igarotzen, eta data hurbildu ahala, xehetasunak azalduko dituztela aurreratu dute udal ordezkariek.

Bidali:  

Erantzunak

Erabiltzailearen aurpegia Herriberri | 2017-07-14 : 14:46

Nola bialdu leike egunien 180 autobus horrenbeste ume ta heldu oinez ibiltzean leku batetik?? Arrixkuetatik ateaberrien arrixkutan sartu behar al gaitu udalak???

Erabiltzailearen aurpegia xoxoteuztarria | 2017-07-14 : 15:10

Anbulategi aurretik ere horrenbeste autobus edo gehiago igarotzen dira, eta hor baino askoz heldu eta ume gehiago ibiltzen da, kendu hortik ere orduan?
Zubia egiterik ere ez zuten nahi etxe multzo horretako bizilagunek: "lasai asko geunden ba", "eske oinbeste trafiko ta umien parkiek"... baina zihur hor bizi diren askok autoa hartzen dutela kalera etortzeko; eta kalean bizi dirnek? zerbait esango dute ba?? Makina bat endredo eta buruauste eman dituzte babes ofizialeko etxe horiek, egiten hasterako eta orain ere....

Erabiltzailearen aurpegia Herriberri | 2017-07-14 : 15:27

Eztakit zer daon hor bizi dan jendien kontra, zeuk jakingozu ze endredo ta buruausteatik ai zean hitzeiten... anbulategi aurrekuek zeoze esango debela? Noski baietz ze trafiko astune herritik kanpoa ateatzie izenber du helburue, bai xanjuandei, bai anbulategi aurrie baita damasore.Kontue da nola in? Xanjuandegiri alternatiba ematie errexa zan, avenidatik ta lixto. Zergaitik izorrauber da beste auzo bat, herriko beste leku batzutan alternatibaik eztaolako ta ola danok izoreatzen die ta gustoa? Hori al da zure ustez onena herriyentzat? Ala alternatibak bilau ala aplikatzen jutie ezta hobeto?

Erabiltzailearen aurpegia AzpeitikoHerritarrak | 2017-07-14 : 15:55

Bizilagunek ganora gabeko errepide-lan ulergaitzak jasaten dituzten bitartean, eta autobusak oraindik auzoan sartu ez direnean nahiz eta aldaketak egin diren, Azpeitiko alkatea desadostasunak soilik sortu dituen zubi baten ustezko onurak zabaltzen dabil.

Erabiltzailearen aurpegia irakurle79 | 2017-07-14 : 16:33

Alkateak esan zuen ekainean eginiko bilera hartan, bidea, autobusak eta trafikoa orokorrean herrigunetik atera behar zela jakinda autobus kopurua goraka joango dela. Toki batzutan, anbulategi aurrea adibidez, teknikoki zaila zela, baina ez dela baztertzen aukera hori. Sanjuandegiko kasura etorriz, aukera badago herrigunetik ateratzeko eta onura ez da etxebeltz eta sanjuandegirentzat bakarrik, herri osoarentzat baizik. Kontutan hartu abenida erditik zeharka pasako den trafiko guztia udaletxeak hartu duen erabakiarekin. Bidea, ahal den tokietan trafikoa kanpora ateratzea da, ados alkatearekin,beraz, aprobetxa dezagun aukera badugula eta ez dezatela 120 metrok errua izan hau ez gauzatzeko, guztion kalterako baita.

Erabiltzailearen aurpegia AzpeitikoHerritarrak | 2017-07-14 : 17:03

xoxoteuztarria
batzuk beren frustrazioa babes ofizialeko etxeekin ordaintzen dute ipurdiko granu handi bat garela leporatuz. Batzuk arazoak gibelarekin ikusten dute eta beste batzuk berriz buruarekin!
hitz egiteko aurrez informatu egin behar da, ez ezjakintzat jo zure burua
=)

Erabiltzailearen aurpegia Herriberri | 2017-07-14 : 17:05

Erabat ados!

Erabiltzailearen aurpegia Betikue | 2017-07-14 : 17:22

Gogoratzen dizuet Etxebeltzen ez daudela bakarrik babez ofizialeko etxeak...besteak ere ez daude bate gustoa udaletxeko txapuza honekin.

Erabiltzailearen aurpegia andrex | 2017-07-14 : 17:41

Zuek erabaki zenuten zubi horren onduen bizitzen jartzie.ez sartu auzo gustiye saltzan.danak eztiabe ola pentzatzen ta...lau katu aizeate kejatzen...

Erabiltzailearen aurpegia AzpeitikoHerritarrak | 2017-07-14 : 18:45

etxebeltz/izaro danak kejatzen KONTUZ!!!
reiterau
hitz egiteko aurrez informatu egin behar da, ez ezjakintzat jo zure burua =)))

Erabiltzailearen aurpegia xoxoteuztarria | 2017-07-14 : 19:03

"AzpeitikoHerritarrak"-i: nik ez dut inongo fustraziorik, neri ere tokatu zitzaidan zozketan babes ofizialeko etxe horietako bat, uko egin nion beste etxe bat erosteko aukera eduki nuelako; zentzu horretan ez zait granorik atera.
Herriberri-ri: komentario soil bat izan da, hasieratik zer esan asko eman duelako eta zenbait burukomin etxea tokatu zitzaiotenei, legalak zirela eta ez zirela...eta orain hau, sin mas izan da.
Nik bertako entzun ditudan komentario guztiak negatiboak eta kexak izan dira, ez dut besterik entzun. Eta ez dut esan "bizilagun guztiak".
Ederra litzateke kaleetan autorik ibiliko ez balitz edo gutxi behaintzat. Baina geuk zer egiten dugu? Daneako kotxi hartu. Hasi gaitezen oinez ibiltzen. Hau aldau laike baino gu gandik hasita

Erabiltzailearen aurpegia NINEUBA | 2017-07-14 : 20:43

Garbi dagoena da ahal den neurrian autobusak kanpo aldera atera behar direla leku guztietan, hau ez da barriyo hau edo beste hemendik pasauber ote dan.... baizik eta seguridade eta ze eratako herriye nahi deun

Erabiltzailearen aurpegia AzpeitikoHerritarrak | 2017-07-14 : 23:13

"xoxo" =)
Ikusten denez, botoek eta postu politikoek, herritarren ongizatearen baino garrantzi handiagoa daukate. Asko edo gutxi izan, gure segurtasun eta bizi-kalitatea defendatzeko eskubidea dugula uste dugu, beste edozein herritar bezela. LASAI

hitz egiteko aurrez informatu egin behar da, ez ezjakintzat jo zure burua =)))

Erabiltzailearen aurpegia Herritarbat | 2017-07-14 : 23:40

Lau Katu bakarrik ez gea ba kejatzen geanak ta haserre gaudenak...ta hemendik gutxira, auzokuek bakarrik ez... denbora izangoa testigu, seguru eon baietz...abenidatik ibiltzie abentura bat izangoa eta, Azpeitiar danontzako. Zeoze larriye pasau arte beti bezela...gauzak mejoratzen jun beharrien, akats berdinek errepikatzen. Ta Azpeitiar danon dirue, harrika botatzen...

Erabiltzailearen aurpegia gazte82 | 2017-07-15 : 00:23

Azpeitin ba herri osotik pasatzek autobuse, xanjuandein bizigeanok 180 autobus euki ditxiau, ta ze txorakei,umiek herri osun zebiltzek , ta 5400 laguneko auzo batek normala paradi eukitzie, ta etxebideko jendin kejak ulertzie baleikek baño zubi horrekin kejan dabilen jendiei pasue itxiko nitxokek, alkatik ze inber dik ba etxebiden bizi din 50 kejaatik pasu itxi.

Erabiltzailearen aurpegia Ane | 2017-07-15 : 08:33

Udalak esateu gai honen inguruen eztaola konsensoik, hori garbi dao. Hau hola izen da ez al luke ikuspuntu teknikuek pisue hartu ber?
Ta irakurtzen ai gean argumentuei beituta:
-Abenidatik pasatzien aldekuek: segurtasune, autobusen ibilbidie azkartu/erraztu, bizi kalitatie (zarata, kutsadura, etabar)
-Sanjuandeitik pasatzien aldekuek: 120 metro gehio ez ibili parada juteko, Etxebeltz-Izarran bizi dienakiko "amorrue", bai etxe libretan bizi dienai, etxe earra daukebelako ta ze esanik ez VPOko etxietakuei

Ze argumentok daukebe indar gehio?

Erabiltzailearen aurpegia Irruti | 2017-07-15 : 11:24

ikuspuntu teknikuek ez altzun kontun artu autobusek lengo bidetik - bide zarra- len bezela bere bidea egin ta zubi berriye utzi bi barriyo lotzeko.
udalan anka zartze galanta posibilidade hau kontun ez eukitzea izan da.
abenidako bairruk bere arrazoye du, sanjuandegiko barriyuk ere bai. Autobuzak bire zarretik, ta kitto denak kontentu

Erabiltzailearen aurpegia Bizilaguna | 2017-07-15 : 14:01

Herritarrei galdera bat orokorrien: umie pistinara bidaltzen dituzuenien eta kanpokaldien nola ibiltzen dien jakinda (goxokiyek erosten adibidez), ze nahio dezue, autobusek hortik pasatzie ala abenidatik? Nola ibiliko zeate lasaio?

Erabiltzailearen aurpegia Bizilaguna | 2017-07-15 : 14:04

Beste galdera orokor bat famili, korrilakari, paseante eta abarri: ze nahio dezue, autobusek eta trafikue abenidan zehar ibiltzie edo abenidie erditik zeharkatuz, bidie moztuz? Umiek bizikletan Loiolaruntz abenidatik juten lehen bezain lasai utziko al dituzue hemendik aurrea?

Erabiltzailearen aurpegia earki | 2017-07-15 : 15:54

Oin gañea herritar guztiyen onaatik hitzeiten ai zeatela esangoezute barriyo hortakuek.Gustoko ez dezuten zubiye kentzeko ez ibili pentsatze ez dituzuten argumentuek. Edo IBI inpuestue ez pagauber izeteko kanpaña harere zertzan herriyen oneako?
Danakin badezute zeoze barriyo hortan.

Erabiltzailearen aurpegia makolo | 2017-07-15 : 16:31

Gainea udaletxeari bizkarretik ai diela esaten?? jaja noiztik zeate azpeitiko urbanismoko arduradun..hitza emate honek batzuetan arazo hau ekartzen du..eznituke nahiko alkatetzat hauek frankismoa bueltan berriro

Erabiltzailearen aurpegia erabiltzailea | 2017-07-17 : 08:03

Artikuluak dio:

[... azaldu du Etxeberriak. Era berean, nabarmendu du zubiaren diseinua ez dela orain egindakoa, "bere garaian diseinatutakoa" baizik.]

Hau ez da hala. Bere garaian egindako proiektuan zubia ez zegoen hor.

Uztarria, ez litzateke gaizki deklarazioak kontrastatu eta egiak plazaratzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa