Azpeitiko Ikastola Karmelo Etxegaraik eta Urola Ikastola BHIk ikasturte amaierako jaialdia egingo dute ostiralean, hilaren 16an, Azpeitiko kiroldegian. 19:00etan hasiko da emanaldia, eta ehunka umek dantzaz eta kantuz alaituko dute gunea. Ondoren, ohiko legez, Batxilergoko ikasleei orlak banatuko dizkiete. Karmelo Etxegaraiko ordezkariek jakinarazi dutenez, toki arazoak direla-eta, sarrerak mugatuak dira eta dagoeneko banatu dituzte familien artean.
Bestalde, larunbatean egingo dute Azpeitiko Ikastola Ikasberriko ikasleek, irakasleek eta gurasoek ikasturte bukaerako jaia. 11:00etan hasiko dute festa, suziria botata eta pregoia irakurrita, eta ikasleek aurreskua egingo dute. 11:15ean orlak banatuko dizkiete Batxilergoko ikasleei, eta ondoren Haur Hezkuntzako ikasleek ekitaldia eskainiko dute. 12:00etarako haurrentzat, irakasleentzat eta gurasoentzat jolasak eta tailerrak prestatu dituzte.
Segidan, 13:45ean, bazkaltzeko tartea hartuko dute Haur Hezkuntza 3. mailatik Lehen Hezkuntza 6. mailara arteko ikasleek. 14:30ean, berriz, gainerakoek bazkalduko dute. Bazkalostean, 15:00etatik 18:00etara, tailerrak eta puzgarriak izango dira ikastolan bertan. 16:00etan, aldiz, antzerki emanaldiaz gozatu ahal izango dute bertaratzen direnek. 17:00etan, Ikastolako Izarrak emanaldia izango da, eta egunari bukaera Kupela taldearen erromeriarekin emango diote. Ikasberriko kideek azaldu dutenez, egun osoan zehar txosna zabalik izango da ikastolan.