Euskarazko Internet Eguna ospatu dute, sarean euskarari ikusgarritasun handiagoa ematea xede

Uztarria.eus | Euskara | Argazki galeria
2017-05-18 11:29

PuntuEus Fundazioak eta Kulturaz kooperatibak antolatuta, Euskarazko Internet Egunaren bigarren edizioa ospatu zen atzo, maiatzak 17, Sanagustin kulturgunean. Bertan izan ziren, besteak beste, Mikel Irizar Gipuzkoako Foru Aldundiko Hizkuntza Berdintasuneko zuzendaria, Koldo Tellitu Ikastolen Elkarteko lehendakaria, Iban Arregi Berria Taldeko kontseilari ordezkaria, Josu Waliño PuntuEus Fundazioko zuzendaria eta Lorea Arakistain fundazio bereko ordezkaria, Iñaki Alegria UEUko zuzendaria… Miren Gaztañaga aktoreak eta Xabi Solano eta Zigor DZ musikariek ukitu ludikoa eman zioten ekitaldiari.

Bertan, Interneten ere lehen hitza euskaraz lelopean abiatu duten kanpaina aurkeztu zuten, ordenagailuak zein eskuko telefonoak euskaraz jartzearen garrantzia nabarmenduz. Horrekin batera, beste tresna bat ere aurkeztu zuen PuntuEusek: Tori.eus. Fitxategiak partekatzeko zerbitzua da. Badira Tori.eus-en antzeko webgune gehiago jadanik martxan —WeTransfer, adibidez—, baina bi aldaketa egin nahi dituzte Tori.eus-ekin.

Batetik, doakoa izango da zerbitzu osoa. "Zerbitzu hauek, normalean, doako bertsio mugatu bat izaten dute, eta, funtzionalitate guztiak erabiltzekotan, ordainpeko bertsioa kontratatu behar da. Tori.eus-en kasuan, ez; erabiltzaileek ez dute muga berezirik izango doako bertsioa erabiltze hutsagatik, ez baita ordainpeko bertsiorik egongo”, azaldu zuen PuntuEuseko ordezkari Lorea Arakistainek. Bestetik, euskarazko zerbitzua emango dute. "Hizkuntzaren ikuspegitik egitasmo berritzailea da. Era horretako zerbitzu gehienak ingelesez daude, eta bakarren batzuk, gaztelaniaz". Beste pauso bat da, beraz, Interneten euskarari ikusgarritasun handiagoa emateko.

Ikusi argazki guztiak haundiago

 
Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa