Zabalik dago Sorkuntza Bekara proiektuak aurkezteko epea

Uztarria.eus | Kultura | Artikulua
2017-05-02 13:44

Sortzaileek ekainaren 3ra arte izango dute proiektuak aurkezteko aukera. Diru-laguntzak banatzeko orduan kontuan hartuko dituzte, besteak beste, proiektuen interesa, kalitatea, originaltasuna, diziplina ezberdinak nahastea eta Azpeitiko kulturari egin diezaioketen ekarpena. Aurten, gainera, Azpeititik kanpoko sortzaileek ere aurkez ditzakete beren proiektuak Sorkuntza Bekara.

Iaz Sorkuntza Beka jaso zuten herritarrak eta Kultur Mahaiko zein Udal ordezkariak.  Ikusi haundiago | Argazki originala

Gaur, asteartea, zabaldu dute 2017ko Sorkuntza Bekara lanak aurkezteko epea, eta zabalik izango da ekainaren 3a arte. 16 urtetik gorako edonork aurkez ditzake proiektuak bekara, eta aurten aurrenekoz Azpeititik kanpoko sortzaileek ere izango dute horretarako aukera. Sortzaileek edozein kultur arlotako proiektuak aurkez ditzakete (musika, pintura, eskultura, literatura, antzerkia, komikia, soinu konposizioa, ikus-entzunekoa, dantza...), baina laguntzak banatzerako orduan kontuan izango dituzte, besteak beste, proiektuen interesa, kalitatea, originaltasuna, diziplina ezberdinak nahastea eta Azpeitiko kulturari egin diezaioketen ekarpena. Eskatzaile bakoitzak nahi adina proiektu aurkez ditzake bekara, baina sortzaileko gehienez bi proiektu lagunduko dituzte diruz. 

Iaz jarri zuten martxan Sorkuntza Beka Azpeitiko Udalak eta Kultur Mahaiak kultur sorkuntza bultzatzeko xedearekin, eta aurkeztu ziren hamar proiektuetatik bost lagundu zituzten diruz. 6.000 euro bideratu zituzten sortzaile gazteen proiektuak diruz laguntzera, eta aurten diru partida hori bikoiztu dute. Hala, 12.000 euro banatuko dituzte aurtengo Sorkuntza Bekara aurkezten diren lanen artean.  

Gaur, asteartea, argitaratuko dituzte 2017ko Sorkuntza Bekaren oinarriak Gipuzkoako Aldizkari Ofizialean (GAO), eta honakoak dira:

  • 16 urtetik gorako edozeinek aurkeztu ahal izango ditu proiektuak.
  • Edozein kultur arlotako proiektuak lagunduko dira diruz.
  • Eskatzaile bakoitzak nahi adina proiektu aurkez ditzake, baina gehienez bi proiektu lagunduko dira diruz.
  • Kontuan hartuko dira proiektuen interesa, kalitatea, originaltasuna, diziplina ezberdinak nahastea, Azpeitiko kulturari egin diezaioketen ekarpena, eta genero ikuspegia eta bazterketa soziala jasateko arriskuan daudenak ere kontuan hartzea.
  • Proiektuak aztertzeko sei laguneko taldea eratuko dute Udalak eta Kultur Mahaiak hiruna kiderekin.
  • Azpeitian bi urtez erroldatuta egotea baloratuko da; baina Azpeititik kanpoko sortzaileek ere izango dute beka jasotzeko aukera.
Bidali:  

Erantzunak

Erabiltzailearen aurpegia azeitunabeltza | 2017-05-02 : 14:00

Honakoak bereziki harritu nau: Azpeititik kanpoko sortzaileek ere izango dute beka jasotzeko aukera. Ez al da hobe bertako sortzaileei laguntzea? Nik ez dut beharrezkoa ikusten lanak aurkezteko aukerak zabaltzea. Bertan abiatutako beka bertakoentzat, eta kitto.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa