Esku-pilotako Emakumeen Master Cup txapelketaren lehen edizioan indartsu ari dira azpeitiarrak. Bi mailatan banatuta dago txapelketa, Elite eta Lehen Maila. Bigarren horretan, joan den asteburuan final laurdenetako bi partida jokatu zituzten Zumarragan, eta bietan tartean izan ziren azpeitiarrak. Horrela, Nagore Aramendik eta Oihana Unanuek osatutako bikoteak finalaurrekoetarako txartela eskuratu zuen, Lucia Fonseca eta Iratxe Ibarra 18-9 gaindituta. Beste final laurdenekoan, aldiz, Maddi Unanue azpeitiarra kanporatua izan zen: Naroa Agirre zestoarrarekin bikotea osatuta, 18-14 galdu zuen azpeitiar gazteak, Arrate Bergararen eta Alba Martinezen kontra.
Elite mailan beste bi azpeitiar ari dira lehian. Alaitz Badiola, Asteasuko Irati Otaegirekin, ostiralean Iruñeko Labriten jokatuko diren final laurdenetarako sailkatuta dago. Maite Iriarte, berriz, Patri Espinarrekin ari da jokatzen txapelketa. Espinar min hartuta dago eta oraindik ez dago argi aste honetara atzeratutako final zortzirenetako kanporaketa jokatzeko moduan izango diren.