Izarraizko mendi lasterketan izena emateko epea zabalik da. Gaur, ostirala, 10:00etan ireki dute izen-ematea www.kirolprobak.com atarian. Aurtengo edizioa XII.a da, eta apirilaren 22an jokatzea aurreikusita bazegoen ere, antolatzaileek jakinarazi dutenez, astebete atzeratu dute data. Beraz, apirilaren 29an izango da aurtengo Izarraizko mendi lasterketa.
Urtero Izarraizko txokoeten barrena egiten den mendiko proba da Izarraizko Mendi Lasterketa. Antolakuntzaren ardura Lagun Onak Mendi Bazkunaren eta Azkoitiko Anaitasuna Mendi Bazkunaren artean txandakatzen da, eta aurtengo lasterketaren antolakuntza Anaitasunari egokitzen zaio.