Emakumeenganako indarkeriaz hausnartzeko eta gaiaz sentsibilizatzeko Beldur Barik programa abiatuko dute bihar, Emakumeenganako Indarkeriaren Aurkako Nazioarteko Egunean, herriko ikastetxeetako Derrigorrezko Bigarren Hezkuntzako (DBH) geletan. Azpeitiko Udalaren ekimenez eta ikastetxeekin elkarlanean jarriko dute martxan programa. Gaur, osteguna, eman dute egitasmoaren berri udal ordezkariek eta ikastetxeetako arduradunek.
Beldur Barik programaren helburua da gazteei indarkeria sexistaren adierazpen ezberdinak identifikatzen laguntzea eta gazteei tresnak eskaintzea, indarkeriaren inguruan hausnartu eta eztabaida prozesuak sustatu ditzaten.
Leire Etxaniz Gizarte Zerbitzuetako zinegotziak azaldu duenez, programarekin "indarkeria sexista sostengatzen duten norbanako eta taldekako portaerak eraldatu" nahi dituzte. Horretarako, harremanak izateko eta elkarbizitzarako eredu berriak bilatzeko lana egingo dute, "tratu onak oinarri hartuta".
Beldur Barik programa Eusko Jaurlaritzak jarri zuen abian duela urte batzuk. Hasieran, gaia azaleratzeko bideo lehiaketa batean oinarritzen zen baina, urteak aurrera joan ahala, indarkeria matxistaren gaia lantzeko material eta euskarri ezberdinak sortu zituzten. Hortik abiatuta jarri dute martxan programa Azpeitian. "Material oso ona zegoela ikusi genuen, baina ez zegoen ondo dinamizatuta, ez zegoelako material hori ikasleei bideratzeko biderik. Horregatik, guk herriko ikastetxeetara jo dugu, material hori ikasleei iristea posible egiteko bide bila".
Aspalditik lanean
Eneko Etxeberria Azpeitiko alkateak azaldu duenez, azken udalbatzan aho batez onartu zen Beldur Barik programa garatzeko konpromisoa, "adierazpen instituzionalak onartzeaz gain, beharrezkoa delako erakunde publikoek dugun erantzunkizunaz jabetzea". Horrez gain, "ardura hartu" eta gaia instituzioen agenda politikoetan jartzea "beharrezkoa" dela esan du Etxeberriak.
Azpeitiko Udalak emakumeenganako indarkeriarekin bukatzeko proiektuak eta zerbitzu ezberdinak martxan jartzen urteak daramatzala azaldu du Etxeberriak: "Erakundeen arteko koordinazio eta jarduera protokoloa, hezkidetza programa eta festetako kanpainak abiatu ditugu, besteak beste". Bestalde, erreferentzia egin dio gaur egungo egoerari, eta esan du Azpeitian indarkeria matxista egon badagoela: "Datuek erakusten dute ez dela nahikoa. Aurten, Udaleko Gizarte Zerbitzuek lau kasu berri artatu dituzte, eta horietatik bik 27 urte baino gutxiago zituzten", azaldu du. Horrez gain, azpimarratu du azken urteetan errepikatzen dela joera hori, "gero eta belaunaldi gazteagoetan gertatzen baitira indarkeria kasuak". Horrela, neska eta mutil gazte guztiengan arreta jartzea erabaki du Azpeitiko Udalak.
Leire Goenaga Hezkuntza zinegotziak, bere aldetik, gogoratu du bederatzi urte daramatzatela Hezkuntza, Parekidetasun eta Gazteria sailek, elkarlanean, prebentzio lanean oinarritutako hezkidetza programa garatzen. Hori osatzera dator Beldur Barik programa. Horrez gain, eskerrak eman dizkie herriko lau ikastetxeei "erronka honetan bidelagun izateagatik", eta indarkeria matxistaren gaiaren bueltan egindako lan guztiagatik zoriondu ditu.