Alde Zaharreko Tabernarien Elkarteak (AZTEk) antolatuta, Azpeitia Motor Festibala izango da zapatuan, irailaren 3an, Perez Arregi Plazan. Motorrak eta metal musika oinarri, egun osorako egitaraua prestatu dute.
10:00etan emango diote hasiera antolatutako jaialdiari, eta hainbat lagunek motorrean buelta bat emango dute herrian zehar. Ondoren, 13:00etan, metal poteoa egingo dute. 15:00ak aldera bazkari herrikoiaren txanda izango da. Bertan paella, postrea, kafea eta edaria izango dira 15 euro ordainduta. Bazkarian parte hartzeko izena eman daiteke oraindik 943-02 68 56 zenbakira deituta. Festa arratsaldean lehertuko da, metal kontzertuekin.
Sona handiko taldeak
Txoko ezberdinetik etorritako bost talde igoko dira zapatuan Perez Arregiko oholtzara, euren doinuekin plaza girotzeko asmoarekin: Elberth, Euphoric, Ever lever, Hyronike eta Baron Rojo. Azken hori Espainiako heavy-rockaren talde erreferentea da, eta musikariek azaldu dutenez Azpeitira iristeko "irrikitan" daude.