Datorren igandean, uztailaren 10ean, jarraituko du Azpeitia Dantzan egitasmoak, aretoko dantzen erakustaldiarekin. 20:00etan hasiko da Jose Mari Orbegozok zuzendutako ikuskizuna Soreasu antzokian, eta sarrera doakoa izango da.
200 inguru pertsonek hartuko dute parte erakustaldian, eta ikasturtean zehar ikasitakoa erakutsiko dute bertan. Cha cha cha, merengue, bachata, rock, vals, rumba eta beste dantza batzuen erakustaldia egingo dute. Dantzariez gain, Xabier Salbias ere igoko da Soreasuko oholtzara, eta kantuan arituko da Orbegozok dantza egiten duen bitartean. Xabier Elosegi eta Silvia Gambino aktorea ariko dira aurkezle lanetan.
Hurrengo zapatuan, uztailaren 16an, Itsasi Dantza Taldeak emango dio amaiera aurtengo Azpeitia Dantzan zikloari. Bagare ikuskizuna eskainiko du Itsasik Soreasu antzokian, 22:00etan hasita.