Datorren astean, hilaren 27an, hasiko da aurtengo Azpeitiko Erremonte Txapelketa; eta 28an, berriz, Urrezko Aizkoraren finala jokatuko da. Biak Izarraitz pilotalekuan izango dira, eta bi kirol ekitaldi horietarako -txapelketaren lehen jardunaldirako eta aizkolarien finalerako- bost sarrera bikoitz zozkatuko ditu Azpeitiko Udalak. Zozketetan parte hartu nahi dutenek, gaurtik datorren asteazkenera bitartean (asteazkena barne) eman beharko dute izena, udaletxera deituta (943157200 da telefono zenbakia) edota udalzozketak@azpeitia.eus helbidera idatzita.
Bide batetik zein bestetik parte hartuta ere, izen-abizenak eta harremanaterako telefono zenbaki bat emateaz gain, zein zozketatan parte hartu nahi duten edota bietan parte hartu nahi duten zehaztu beharko dute parte-hartzaileek; e-postaz idazten dutenen kasuan, zehaztapen hori mezuaren gaian idaztea eskatu dute udal arduradunek.
Erremonte txapelketaren lehen jardunaldian, bi partida hauek ikusteko aukera izango da Izarraitzen: Matxin III.a eta Labaka, Otaegi eta Ionen kontra; eta Segurola eta Aizpuru III.a, Ansa II.a eta Larrañagaren kontra. Urrezko Aizkoraren finalean, berriz, Arria V.a, Otaño, Rekondo eta Atutxa izango dira lehian.