2015a bukatu baino langabetu gehiagorekin hasi zen 2016a Azpeitian. Urritik abendura beherako joerari eutsi ondoren, abendutik urtarrilera Lanbiden izena emandakoen kopuruak gora egin zuen: 874 langabetu zeuden herrian urtarrilean, abenduan baino 15 gehiago.
2015eko urtarriletik 2016kora bitarteko datuak, ordea, baikorragoak dira. Urtebetean %17,5 jaitsi da langabezia Azpeitian, Urola Erdiko (%13,7) eta Gipuzkoako (%10,4) batez bestekoak hobetuz. 2016ko lehen hilabetean, Azpeitiko langabezia indizea %11,9 da. Emakume gehiago dira lanik gabe daudenak, gizonak baino.
Datu horiek, eta beste hainbat, Iraurgi Berritzenek eman ditu sareratu berri duen 2016ko urtarrileko sozioekonomiako buletinean.