XXXIII. Euskal Antzerki Topaketak bigarren asteburura iritsi dira. Izan ere, aste honetan lau emanaldi izango dira topaketen baitan, gaur, osteguna, hasita. Saio berezia izango da gaur udaletxeko ganbaran, 21:00etan hasita. Atea Teatroaren Zu gabe obra izango da ikusgai, eta 20:00etan jarriko dituzte sarrerak salgai, udaletxeko sarreran.
Bestalde, ostiralean, zapatuan eta igandean ere emanaldi bana izango da. Bihar, ostirala, Huts Teatroa-Artedrama taldearen Etxekoak lana ikusteko aukera izango da, 21:30etik aurrera. Zapatuan, berriz, Eskutitzak obra estreinatuko da, 21:30ean hasita. Antzezlana 1936ko Gerra Zibila lehertu aurreko Azpeitian eta Azkoitian oinarritzen da. Asteburuko azken emanaldia igandean izango da, era Moby Dick eleberri ospetsuaren egokitzapenaz gozatu ahalko da, 18:00etatik aurrera.
Hiru antzezlan horiek Soreasu antzokian izango dira, eta emanaldiak hasi baino ordubete lehenago zabalduko dute leihatila. Helduek bost euro eta 14 urte bitartekoek 3 euro ordaindu beharko dute sarrerako.