Hego Euskal Herriko herri guztietan zapatuan, ekainaren 13an, osatuko dira Udal berriak. Azpeitian ere egun horretan egingo da udalbatza berria osatzeko osoko bilkura, 12:00etan hasita, udaletxeko areto nagusian.
Maiatzaren 24ko udal hauteskundeetako emaitzak tarteko, Eneko Etxeberria izango da beste lau urtez Azpeitiko alkate. Izan ere, Etxeberria zerrendaburu zen EH Bilduk botoen %52,03 jaso eta gehiengo osoa eskuratu zuen. Horrenbestez, hamar zinegotzi izango ditu koalizioak Azpeitiko Udalean -azken lau urteotan baino bat gutxiago-. EAJk, berriz, zazpi ordezkari izango ditu -2011n baino bi gehiago-, botoen %41,29 jasota. Zerrendak aurkeztu dituzten beste bi alderdiek, PSE-EEk eta PPk, ez dute ordezkaritzarik lortu.
Hauek dira 2015-2019 agintaldian Azpeitiko udalbatza osatuko duten zinegotziak:
EH Bildu: Eneko Etxeberria, Estitxu Elduaien, Agustin Lizarralde, Leire Etxaniz, Iosu Labaka, Ainhoa Beristain, Aitor Bereziartua, Ainara Larrañaga, Mikel Ibartzabal eta Leire Goenaga.
EAJ: Aitor Gorrotxategi, Nerea Etxeberria, Aritz Azpiazu, Itziar Lasa, Joxe Aizpuru, Rebeka Larrañaga eta Xanti Gurrutxaga.