Gaur, maiatzak 1, Langileen Nazioarteko Eguna dela eta, aldarrikapena nagusituko da eskualdeko hainbat herritan. LAB sindikatuak, esaterako, eskualdeka deitu ditu mobilizazioak, Langileok borrokan! Euskal Herria aldaketa bidean leloarekin. Azpeititik, Perez Arregi plazatxotik, Zestoara oinezko martxa abiatu dute dozenaka lagunek 10:00ak pasatxoan. Zumaiako Beheko plazatik ere oinezko martxa hasi dute, ondoren, denak Zestoan elkartzeko. 12:00etan manifestazioa egingo dute Zestoan.
Bestalde, Prekarietateari ez! lelo hartuta manifestazio nazionala egingo du gaur ELAk Bilbon: 11:45ean, Jesusen Bihotzean ekitaldia egingo dute, eta 12:15ean abiatuko da manifestazioa bertatik. Urola Kostako eskualdetik hiru autobus joan dira.