Osasunaren eta istripuen prebentzioaren astea antolatu du DYA-k Azpeitian. Datorren astelehenean, hilaren 16an, hasi eta ostirala bitartean bost hitzaldi eta tailer eskainiko dituzte. Parte-hartzea doakoa bada ere, beharrezkoa da izena ematea, antolatzaileei lanak errazteko. Horretarako, 943464622 telefono zenbakira deitu daiteke, edo irakaskuntza.eskola@DYA.gipuzkoa.com helbidera mezua bidali. Hitzaldi eta tailer guztiak DYA-k Azpeitian duen egoitzan izango dira, Urola kalean, 19:00etatik 21:00etara.
Hau da datorren asterako prestatu duten egitaraua:
Otsailak 16, astelehena: Ohiko larrialdiak zein diren ikusteko eta haien aurrean nola jokatu jakiteko hitzaldia. Gai hauek landuko dituzte, besteak beste: miokardioko bihotzekoa, konbultsioak, zorabioak, traumatismoak, erredurak edo garun-baskular istripuak.
Otsailak 17, asteartea: Benden oinarrizko tailerra, gorputzeko hainbat zatitako bendajeak landuz.
Otsailak 18, asteazkena: Etxeko istripuen prebentzioari buruzko hitzaldia. Erredurak, erorikoak edo intoxikazioak izango dituzte mintzagai.
Otsailak 19, osteguna: Bihotz-biriken suspertzeari buruzko tailerra. Oinarrizko mugimenduak ikasi eta praktikatuko dituzte.
Otsailak 20, ostirala: Zure bihotza zaintzea deituriko hitzaldia eskainiko dute, eta osasuna zaintzeko aholkuak emango dituzte.