'Urola Kostako Hitza', papera eta sarea berrituta

Urola Kostako Hitza | Komunikabideak | Artikulua
2015-01-27 12:37

Diseinu berria estreinatu du gaur, asteartea, Urola Kostako Hitza-k papereko euskarrian eta webgunean. Kalitate bera paperean, atal berriak webgunean.

'Hitza'-ren webgune berritua.  Ikusi haundiago | Argazki originala

Diseinu berriarekin esnatu da gaur Urola Kostako Hitza egunkaria. Hamaikagarren urteurrenaren atarian, irakurleengana modu freskoagoan eta erakargarriagoan iristea da aldaketaren helburua, informazioa emateak bezainbeste garrantzia baitu emateko moduak. Gaur egungo tendentziei jarraituz, zurruntasunak alde batera utzi eta joko gehiago ematen duen diseinuaren aldeko apustua egin du eskualdeko komunikabideak. Logoa ere gaztetuta ageriko da hemendik aurrera.

Aldaketa handiena, ordea, egunkariaren atari digitalak izan du. Gaurtik aurrera itxuraz ez ezik, atalei dagokionez ere berrituta dator urolakosta.hitza.eus ataria. Komunikabide horrek .eus domeinuarekin bat egin zuen hasieratik, eta hemendik aurrera hala agertuko da munduaren aurrean.

Atal berriak

Edukiari dagokionez, Interneteko irakurleei ahalik produktu osatuena eskaintzen saiatu da Hitza, eta hala, betiko atalez gain, Multimedia eta Agenda bezalako atal interesgarriak ditu atari berrituak. Hitza-k lantzen dituen bideoez gain, ikus-entzunezkoen atalean eskualdeko hainbat lan interesgarri ere aurki daiteke: dokumentalak, musika taldeen bideoklipak eta film laburrak, besteak beste.

Agenda atalean, berriz, irakurleak bere herriko eta inguruetako ekitaldien berri izango du klik batean. Iritzia atala ere berria izango da: astero paperean beren sinadura uzten dute Bostekoa-ko lagunek euren txokoa izango dute webgune berrituan, eta egunkariak argitaratzen diren gutunak ere irakurri ahal izango dira. Harpidedunen Txokoan beren fideltasuna eskertuko zaie egunkariko harpidedunei hain zozketaren bidez, eta bitxikerien atal bat ere izango du hemendik aurrera urolakosta.hitza.eus atariak: Hara! Gainera, azken urteetan bezala, sare sozialetan egoten jarraituko du egunero-egunero euskarazko eskualdeko komunikabideak.

 

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa