Banan-banan talde guztiak mendean hartu ondoren, gaur partida erabakiorra jokatuko du Urola Ikastolako nesken saskibaloi taldeak San Viator taldearen kontra, 18:30ean, Azpeitiko kiroldegian. Gaurko partida irabazita Final Four txapelketa jokatzeko aukera izango luke Azpeitiko taldeak.
Urola Ikastola taldeak herritarrak Kiroldegira gonbidatu ditu gaurko partida ikustera. Izan ere, "guretzako oso partida garrantzitsua da gaurkoa, eta denen animoak beharko ditugu".
Urola Ikastolako nesken taldeak atzean hainbat talde utzi du. Aurreko fasean, Gipuzkoako Bruesa txapelketa irabazi dute. Ondoren, Bizkaiko txapeldunak mendean hartu zituzten; eta, orain, Arabako Tau txapelketako irabazleak izango ditu aurrez aurre, hau da, San Viator taldea.
Arabako taldeari irabaztea lortuz gero, Final Four txapelketa jokatzeko aukera izango dute. "Txapelketa hori Madrilen jokatuko da hiru egunetan. Beraz, gaurko partida hil ala bizikoa da", diote.