Azpeitiko ezker abertzaleak eta Amnistiaren Aldeko Mugimenduak (AAM) gaur (larunbata) Iñaki Errazkin alkatearen kontrako zentsura mozioa kritikatu dute, "epaiketa politikoa" izan delako, ezker abertzaleak esan duenez. "Madrilen diseinatutako kriminalizazio estrategiaren baitako epaiketa. Epaiketaren helburua ezker abertzalea mapa politikoan baztertu eta independentiston proiektu politikoa ilegalizatzea da".
AAMren ustez, "benetako apustua egina dute Euskal Herriko sektore oso bat espetxeratu, isildu eta ezabatzeko. Zentzu honetan ulertzen dugu PNVk gaur Azpeitian aurrera eraman duen operazio politikoa".
Ezker abertzaleak "konponbiderako konpromisoa berretsi" du. "Herri honen hitza eta erabakia errespetatzeak ekarriko du gatazkaren gainditzea, eta horretarako elkarrizketa bidez akordioa lortzea da bide bakarra".
Bi erakundeek Ertzaintzak izandako jokabidea kritikatu dute. "Azpeitian datozen hilabeteotan izango duguna aurreratu nahi izan digute. PNVrekin batera errepresioa areagotzeko arrisku handia dago herrian", iritzi dio AAMk.
Azpeitiko ezker abertzalearen agiria
"Gaur burutu den operazio politikoaren aurrean Azpeitiko ezker abertzaleak zera adierazi nahi du:
- PNVk EAko zinegotzi baten laguntzaz aurrera atera duten zentsura mozioaren atzean helburu politiko zehatzak daude. Presio mediatiko nahiz politikoen ondorioz bultzatutako operazioa izan da, gaur EAko interbentzio politikoak argiki esan duen bezala.
- Gaur Azpeitian burutu dena epaiketa politiko bat izan da. Madrilen diseinatutako kriminalizazio estrategiaren baitako epaiketa. Epaiketaren helburua ezker abertzalea mapa politikoan baztertu eta independentiston proiektu politikoa ilegalizatzea da.
- Argiki salatu nahi dugu, Ertzaintzak azken aste honetan izan duen jarrera. 11:00etan burutu nahi genuen kontzentrazioa ilegalizatu eta giroa tenkatu besterik ez du ekarri. Zer esanik ez gaur izan duen jarrera, 10:30ean herriko enparantza okupatu dute, armak eskuetan eta jarrera probokatzaile argietan. Ikusi besterik ez dago epaiketa politikoaren amaieran izan duten jarrera, ezker abertzaleko kideak jipoitu eta sakabanatuz.
- PNVk herrian Inazio Uriaren hilketa baliatu du alkatetza lortzeko. Inazio Uriaren familiari zor zaion errespetu guztiaz PNVk gaur izan duen jarrera salatu nahi dugu. Familiaren erabilpen politiko lotsagabe eta lotsagarria izan dela deritzogu, alkatetza lortzeko operazio politikoa Inazio Uriaren izenaz mozorrotzen saiatu baitira.
- Amaitzeko Euskal Herriaren konponbiderako dugun konpromisoa berresten dugu. Herri honen hitza eta erabakia errespetatzeak ekarriko du gatazkaren gainditzea, eta horretarako elkarrizketa bidez akordioa lortzea da bide bakarra".
Azpeitiko Amnistiaren Aldeko Mugimenduaren agiria
"PNV alkatetzara iritsi eta gure herrian aurrena eman den gertaera plazan Ertzaintzak buruturiko karga izan da. Porrez, eskuz eta ostikadez Azpeitiko herritarrak jo dituzte. Honez gain, salatu nahi dugu goizetik plaza inguru guztia okupatu duela Ertzaintzak, metrailetak eskuan hartu eta herrian izua zabalduz. Gaineratu nahi dugu azken egunetan asko ugaritu dela herrian kalez jantzitako polizien presentzia.
Egunotan errepresioaren aurpegi ezberdinekin aurrez aurre topo egin du herrian. Mobilizazio bat debekatu dute, kartelak eta pankartak kentzen ibili dira, herritarrei jarraika ibili dira, herritarrak identifikatu dituzte eta gaur bertan karga bat burutu dute. Rubalcaba gerra ministroaren errepresio estrategiaren logikan eman dira Azpeitian gertaera errepresibo hauek.
Benetako apustua egina dute Euskal Herriko sektore oso bat espetxeratu, isildu eta ezabatzeko. Zentzu honetan ulertzen dugu PNVk gaur Azpeitian aurrera eraman duen operazio politikoa, eta zentzu honetan ulertzen dugu PNV herriko Udalera iritsi eta lehenengo gertaera herritarren aurkako karga bat izatea.
Azpeitian datozen hilabeteotan izango duguna aurreratu nahi izan digute. PNVrekin batera errepresioa areagotzeko arrisku handia dago herrian.
Aurrerantzearen ere errepresio eta eraso hauen aurrean mobilizatzeko eta erantzuteko deia luzatzen diegu herritarrei".