Tentsioa udalbatzar hasieran, plenoan eta ondoren. Eta, batik bat, ondorengoa izan da tentsiorik handienekoa, Ertzaintzak plazan kargatu egin duelako, 12:45ak aldera.
Plenoa 12:35ean bukatu da eta handik bost minutura utzi dute aretoa Julian Eizmendi alkate berriak eta EAJko zinegotziek, arduradunek eta jarraitzaileek. Ezker abertzaleko ehunen bat lagun plazan elkartuta zeuden, EAJren aurkako eta ANVren aldeko oihuak egiten. 30en bat ertzain zeuden han, eskopetekin eta burua estalita. Jeltzaleek plaza utzi dutenean ertzainek kargatu egin dute ezker abertzalekoen kontra. Ez dute gomazko pilotarik bota, baina jendea jo egin dute borraz, eta lurrera bota ere bai. Komunikabideetako kazetari, argazkilari eta telebista kamera batzuek ere jaso dituzte ertzainek bultzakadak.
Liskarra hasi denean, artean Iñaki Errazkin gaur arteko alkatea udaletxean zegoen, baina segituan jaitsi da, Xanet Esnaola alkateorde ohiarekin batera, eta Ertzaintzako buruarengana joan dira, hitz egitera. Errazkinek esan die jendea plazan elkartuta zegoela, euren aldarrikapen eta kritika oihuak egiten, eta hori errespetatzeko eskatu die. Ertzainek, baina, jendea joka segitu dute. Berriro joan zaie Errazkin, eta plaza uzteko eskatu die.
Gaur arteko alkateak 12:45ean ezker abertzaleko jarraitzaileak plazan bildu ditu, kiosko aurrean, eta eskerrak eman dizkie gaur udalbatzarrera babesa agertzera joateagatik. Ezker abertzaleak orain arte bezala lanean jarraituko duela adierazi du hark. Ondoren Eusko gudariak abestu dute ertzainak hiru metrora zituztela, eta plaza uzten joan dira. Poliziak orduan hasi dira euren furgonetetara joaten.
"Hementxe, oraindik alkate paperean", esan du ironiaz Errazkinek bukaeran, jendea zoriontzera joan zaionean.
Azkeneko albistea (hilak 17, 19:30). Iturri batek dio EAJkoei txanponak bota dizkietela ezker abertzaleko jarraitzaileek; Uztarriak egiaztatu ahal izan du hori. Uztarria.com-eko irakurle batek albiste honetako erantzun batean dio ezker abertzaleko jarraitzaileek plazan, udalbatzarraren ondoren, EAJko zinegotziei txanponak bota dizkietela, eta orduan erantzun duela Ertzaintzak. Hau da irakurle horrek dioena web honetan (Kartujuek, 25.ak): "Ertzainek kargau diabe ezker abertzalekuek, pake pakien PNV-ko sinegotziak txalotzen zeuden herritar batzuen gainera etorri direnien. Ordurako mina egiteko lain txanpon botata zeuzkeaben ezker abertzalekuek".
Uztarriak, bertsio hori jakin ondoren, egiaztatu ahal izan du hala izan dela, plazan zeuden lagun batzuek txanpon batzuk bota dizkietela EAJkoei, hauek udaletxetik irtetean.