Martxoaren 8a igaro berritan, Azpeitiko Bilgune Feminista "gustura" agertu da Emakumeen Nazioarteko Egunak herrian izan zuen erantzunarekin. "Oso balorazio positiboa egiten dugu. Manifestazioan 150 bat lagun elkartu ginen eta txotxean, berriz, 180 bat pertsonek parte hartu zuten". Datu horiek kontuan hartuta, "gustura" dago emakume taldea. Gero, Bota pa perkusio taldeak ere "giro ederra" sortu zuela gaineratu dute.
"Aste feminista ere biribil"
Aldarrikapen egunaz gain, hala ere, aste feminista egin zuten aurreko aste guztian zehar eta ekimen horietan ere herritarren erantzuna "ona" izan zela dio Bilgune Feministak. Martxoaren 7an, esaterako, irakaskuntzan egin zuten kontzentrazioan 100 ikasletik gora izan zirela esan dute. Ildo beretik, Zine Melita, Kurdistango emakumearen hitzaldiaren "aberastasunari" garrantzia eman diote emakumeek. "Hitzaldian jendearen parte-hartzeaz gain, oso aberatsa izan zen emakume hura Azpeitira ekartzea. Azken batean, bi errealitate desberdinetan bizi garela ikusi bagenuen ere, funtsean, lanean helburu edo oinarri berdinetatik ari garela ikusteko balio izan zigun. Biribil atera da".
Aurrera egiteko indarra
Herrian "feminismoaren inguruko sentsibilizazioa" badagoela ondorioztatu dute. "Horrek indarra eman digu aurrera segitzeko eta feminismotik harreman berriak eraikitzen jarraitzeko".