Komiki-bloga
Andoni Salegi marrazkilaria da. Denbora asko darama Uztarria herri-aldizkarian kolaboratzen, hilero binetak eginez (sei urtean eten txiki bat baino ez du izan). Orain, aldizkariko binetez aparte, bloga edukiko du uztarria.com-en: KomikiBloga
Salegik, propio blogerako egingo ditu binetak eta marrazkiak. Batzutan, 'Otsobeltz'-enak, bere pertsonaiarik maiteenarenak (aurrenekoa halaxe egin du).
Argazkiekin-eta esperimentatzeko gogoa adierazi dio Uztarriari. "Gauza berriak probatu eta jendeak nola erreakzionatzen duen ikusi nahi dut, batez ere", esan du.
Duela gutxi, liburua argitaratu du Uztarria Kultur Koordinakundearekin: Otsobeltz. Liburu bera ere blogean sartzen joango da poliki-poliki. Liburu osoa sarean jartzeko modua horixe izango da. Uztarria aldizkarian sartzen dituenak ere gehituko ditu blogean.
Euskarazko lehen komiki-bloga
Uztarriak dakiela, euskaraz sortuko den lehen komiki-bloga izango da (3arrano.com webgunean Bilo eta Nano tira teknologiko famatua euskaraz ematen dute, itzulita).
Erdaretan zabalduago daude era horretako blogak. www.gapingvoid.com, www.deadguylives.blogspot.com, ipsofactocomic.blogspot.com, eta www.dilbert.com dira adibide batzuk.
Nerea Arangurenek, adio
Nerea Arangurenek utzi egingo dio bloga idazteari, azkenaldian eginbehar asko batu zaizkiola-eta halaxe erabaki baitu.
Uztarriak eskerrak eman nahi dizkio Nereari, egindako guztiagatik.