Uztarriak eta Baitek bat egin dute, erakunde eraginkorragoa bihurtu asmoz

Uztarria.eus | Taldeak | Artikulua
2003-11-29 13:11

  • Gaurko bazkideen batzarretan hartu da erabakia, eta Baiteren lan taldea eta ekimenak Uztarriako euskara ardatzera pasatuko dira
  • Urola-Kostako Hitza egunkaria sortzea eta EBPNrako proposamena egitea ere erabaki dira

Esanda bezala, gaur egin dira Uztarriaren eta Baiteren bazkideen batzarrak -Baiterena ezohikoa zen-, eta bertan erabaki da bi erakundeen bat egitea. Uztarria Kultur Koordinadorako eta Baite Euskara Elkarteko talde eragileak duela hilabete batzuetatik ari ziren bat egitearen beharraz hitz egiten, eta bi erakundeetako taldeetan asmoa azaldu ostean, bi zuzendaritza batzordeetan proposamena ontzat jo zen, eta gaur bazkideen batzarrera eraman da gaia; organu goren horietan ere ontzat jo da.

2004ko urtarriletik ariko dira batera. Baiteren talde eragilea, Uztarriaren euskara ardatzera pasatuko da, eta orain arte bezala funtzionatuko du, bere lan taldearekin eta ekimen guztiekin.

Baite sortu zenetik, Uztarriak eta biek elkarrekin egin dute lan: Uztarriako ordezkaritza bat beti egon da lanean Baiten, lokala bera dute, Baiteren aldizkaria Uztarrian egiten da eta Uztarria herri aldizkariaren barruan banatzen da… Horretaz gain, euskara aldetik helburu berak dituztela kontuan hartuta, "herrian nahasmenik edo disfuntziorik ez sortzeko", eta "erakunde bakar sendoa sortzeko, bien arteko bat egitea da onena eta logikoena". Uztarriaren izena mantenduko da.

Bat egitearen ondorioz, honelako erakundea izango da:

  • Komunikazioa, euskara eta kultura ardatzak biltzen dituen erakundea.
  • Bakarra baina askotarikoa.
  • Erreferentziala.
  • Ondo antolatutakoa.
  • Herritik sortua.
  • Sare zabalagoa edukiko du.
  • Sinesgarria. Proiektuak eta ekimenak gauzatzeko gaitasuna duena.
  • Positiboa.
  • Hurrengo urtetik, 2004. urte hasieratik, 800 bazkidekoa (norbanakoak, elkarteak…; Uztarriak orain 690 bazkide ditu, Baitek 285 -hauetatik 170 ez dira Uztarriakoak-)".

Beraz, Uztarria Kultur Koordinadorak bere sorreratik bertatik (1998ko martxoa) dauzkan hiru ardatzei helduko die: euskara, komunikazioa eta kultura ardatzei.

Beste erabakiak

Honako egitasmo hauek ere ontzat jo dira gaur Uztarriaren bazkideen urteko batzarrean:

  • Euskara: Azpeitian udalak Euskara Biziberritzeko Plan Nagusia (EBPN) martxan jarriko duela-eta, Uztarriak EBPNren eta Bai Euskarari Akordioaren uztartzea proposatzea, herrian une hauetan dagoena errespetatuz, eta, azken batean, euskalgintzak EBPNren diseinuan, jarraipenean eta eguneroko lanean parte-hartze zuzena izatea. Hala, udalak euskalgintzari baliabideak ematea.
  • Komunikazioa: Urola-Kostako Hitza euskarazko egunkaria sortzea, eskualdeko beste euskara elkarteekin eta Berria-ren enpresa EKTrekin batera (gizarte eragileak ere baleudeke egitasmoan).
  • Kultura: herrian kultur-gunea sortzeko azterketan sakontzea, eta kultur-diagnostikoa abitzea.
  • Zuzendaritza. Uztarriak zuzendaritza berria dauka, eta Laxaro Azkune da lehendakari berria.
  • Besterik-informazioa: www.uztarria.com berritua martxan jarri da gaur bertan, abenduaren 6an aurkeztuko du Uztarriak efemerideen liburua, mendi gidarena aurreratuta dauka, etorkinen hiztegia harrera ona ari da izaten…

Uztarria herri aldizkariak hurrengo egunetan aterako du abenduko zenbakia, Baitek ere bai berea -azkena Baiteren izenarekin- eta aldizkari horietan egongo da askoz informazio gehiago.

Bidali:  

Erantzunak

bazkide bat | 2003-12-01 : 20:12

Bai, Kultur Koordinadora izaten segituko du Uztarriak. Eta bazkideen batzarrean esan zenez, orain ere hiru ardatz edukiko ditu: euskara, kultura eta komunikazioa. Ardatz bakoitzak talde eragilea izango du, eta hiru ardatzak koordinatzen talde eragile orokorra.

Galdera | 2003-12-01 : 20:12

Eta koordinadora izaten jarraitukoi du?

Agian... | 2003-12-02 : 15:12

Agian zuzendaritza hitza ezabatu beharko litzateke orduan, ezta?

uztarriako bat | 2003-12-02 : 16:12

uztarria lehen koordinadora zen, eta orain koordinadora da. Dena dela, uztarria lehen euskara elkarte ere bazen (legez gordailu bat behar duelako, besteak beste), eta zuzendaritza bat ere bazuen elkarte horrek (legez, zuzendaritza bat behar zelako, besteak beste). Eta uztarria orain euskara elkarte ere bada (Uztartzen euskara elkartea izen ofizialarekin), eta zuzendaritza ofizial bat ere badauka elkarte horrek. Dena dela, lehen bezala, orain ere uztarriako taldeek, erakundeek eta elkarteek osatzen dute Uztarriako zuzendaritza.

puuuufff | 2003-12-02 : 17:12

Hitza, kultur-gunia, kultur-diagnostikue, udalarekin elkarlanien (udal honekin ba ote leike elkarlanik? lenguekin ez....) euskara plana bultzau nahiye, efemeridien liburue.... Puuuff! Badaukezue lana franko!!! Animo, eta segi hola!!!

Agian... | 2003-12-02 : 19:12

ez gaizki hartu nire galdera mesedez. Esan nahi dudana da zuzendaritza kontzeptua baino egokiagoa izango litzatekeela beste bat, mugimendu horizontal baten isla izango litzatekeena, eta lehendakaria izatea legez hala eskatua delako ulertzen eta konpartitzen dut baina nik ez nuke lehendakari bat publikoki erabiliko, talde izaera, indartuko nuke

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa