Udaletxean egin den aurkezpenean, Azpeitiko udaleko alkatea Jose Mari Bastida, kultura zinegotzia Aitor Gorrotxategi, Joxean Bengoetxea Euskal Aktoreen Batasuneko ordezkaria, Pako Aristi Kontxu Odriozola liburuaren idazlea eta Jabier Arizabalo XX. Euskal Antzerki Topaketetako irudiaren egilea izan dira besteak beste.
Aitor Gorrotxategik, XX.Euskal Antzerki Topaketek antzerki "eskaintza zabala" jasotzen dutela adierazi du. "Heldu eta gaztetxoentzako antzelanak izango baitira; genero aldetik ere, drama, umorea... denetarikoak dira". Hala nola, antzerki zale guztiei Topaketerako gonbidapena luzatu die Gorrotxategik. Besteak beste, topaketetan izango diren antzerki taldeak honakoak dira: Hika Ai, ama! antzezlanarekin, Txalo Biblia eta Natatxa antzezlanekin, Bederen 1 Titibiliti antzezlanarekin, Ramon Agirre Ondo esan beharko antzezlanarekin, Dar-Dar Pinotxo antzezlanarekin, Iraulio Panttalone Band Ai Martin bertso-antzerkiarekin eta Elena Irureta, Loly Astoreka, Aitzpea Goenaga eta Eli Elizondo aktoreak osatutako taldea Hau Paraderoa antzezlanarekin. Itsasi Dantza Taldearen Lehena-oraina-geroa, taldearen 25 urteko ibilbidea jasotzen duen ikuskizuna ere antzerki topaketen baitan izango da.
Aktorearen eguna
Bihar, larunbata, azaroaren 9a, Aktorearen Eguna ospatuko da Soreasun 19:00etatik aurrera. Ekitaldi honetan Kontxu Odriozola aktorea omenduko da eta berari buruz Pako Aristi idazleak idatzitako liburua ere aurkeztuko da. Ekitaldi honen baitan, Azpeitiko Lakrikun Antzerki Taldeak esketx batzuk taularatuko ditu.
Kartel lehiaketako saria
XX. Euskal Antzerki Topaketetako kartel lehikaetako irabazlea Jabier Arizabalo irundarra izan da. Topaketen aurkezpenean Arizabalok Azpeitiko alkatearen eskutik jaso zuen 901 euroko saria.