Tolosa aurrena, 73 punturekin, eta Lagun Onak bigarrena, puntu beraiekin. Horrelaxe daude kontuak Preferenten. Jardunaldi bat baino ez da falta eta aurrena geratuko dena igoko da zuzenean Hirugarren Mailara; hain zuzen ere, larunbat honetan jokatuko da azken jardunaldia. Lagun Onak-ek Zarautzen jokatuko du arratsaldeko bostetan eta Tolosak, berriz, Hondarribian. Teorian, azpeitiarrek partidu zailagoa dute, bosgarren tokian baitago Zarautz, eta hamargarren Hondarribia.
Lagun Onak-ek gutxienez Tolosak baino puntu bat gehiago lortu beharko du, bi taldeen arteko gol aldea Tolosaren aldekoa delako: Azpeitian jokatu zen partiduan 2-3 irabazi zuten tolosarrek, eta, bigarren itzulian, 1-1 egin zuten. Bigarren sailkatuta geratuko denak, promozioa jokatuko du. Joan den asteburuan jokatu zen azkenaurreko jardunaldia. Lagun Onak-ek erraz gainditu zuen larunbatean Aretxabaleta, Garmendipen: 4-0. Behin-behineko lider jarri zen, Tolosak hurrengo egunean zuelako partidua; baina 3-2 irabazi zuen Pasajesen kontra.